Qaraqalpaq mámleketlik quwırshaq teatrı dóretiwshilik toparı “Happy kids” balalar baqshasında – balalarǵa baxıtlı demlerdi sawǵa etti
2025-jıl 18-iyun kúni Qaraqalpaq mámleketlik quwırshaq teatrı dóretiwshilik jámááti “Happy kids” atlı mektepke shekemgi bilimlendiriw mákemesinde miyman boldı. Usı sapar sheńberinde balalar ushın arnawlı tayarlanǵan “Baxıtlı balalıq” atamasındaǵı teatrlastırılǵan shou baǵdarlaması kórsetildi.
Shou baǵdarlama ózinde ráńbáreń saxnalıq kórinisler, qızıqlı ertek qaharmanları hám janlı muzıkalıq shıǵıwlardı jámlegen bolıp, kishkenelerge quwanısh hám bayram keypiyatın baǵıshladı. Kórgizbe dawamında balalar tek tamashagóy emes, al belsendi qatnasıwshı sıpatında saxnadaǵı processke qosıldı, ayaq oyınǵa oynadı, sorawlarǵa juwap berdi hám qaharmanlar menen birge ertek sıyqırın sezindi.
Bul sapar balalardıń estetikalıq talǵamın qáliplestiriw, olardı milliy mádeniyatımız hám teatr kórkem ónerine jaqınlastırıw, sonday-aq, balalıq dáwiriniń eń jarqın hám umıtılmas máwritlerin jaratıw maqsetinde shólkemlestirildi.
“Happy kids” baqshasınıń pedagogları hám tárbiyalanıwshılardıń ata-anaları teatr dóretiwshilik toparına tereń minnetdarshılıq bildirip balalar bolsa, ózlerine unagan saxna kórinislerin jáne hám qayta kórgisi keletuģının quwanish penen aytıp berdi.
