Mámleketimizde tálim-tárbiya sistemasın dáwir talapları tiykarında jetilistiriw, jaslarǵa ilim úyretiw hám zamanagóy kásip-ónerlerge baǵdarlaw, olardı ana-Watanǵa sadıqlıq ruwxında tárbiyalawda eń pidayı kásip iyeleri bul álbette–muǵallimler hám ustazlar esaplanadı. Usı tiykarda 30-sentyabr kúni Qaraqalpaq mámleketlik quwırshaq teatrında “Sizge tázim, áziz ustazlar” atlı bayram keshesi bolıp ótti.
Dáslep bayram keshesin teatr direktorı Usmanatdin Mámbetaliev ashıp berip, ustazlarımızdı bayram keshesi menen qutlıqladı hám teatrda kóp waqıttan berli óziniń iygilikli isleri menen jumıs alıp barıp atırǵan ustazlar A.Nurımbetova, P.Kulimov, J.Tulemisova, R.Uteniyazova, R.Utegenov, A.Niyetullaevalardı húrmet jarlıǵı hám sawǵalar menen sıylıqladı.
Sonday-aq, teatrdıń xızmetkerleri tárepinen ustazlar húrmetine arnap koncert baǵdarlaması qoyıp berildi. Haqıyqatında da, biz búgin zamanagóy bilim hám kásip-ónerlerdi, shet tillerin puqta iyelep, keleshekke úlken úmit hám isenim menen qádem qoyıp atırǵan, erteńgi kúnimizdiń sheshiwshi kúshi bolǵan perzentlerimizdiń kámalında ustazlarımızdıń sheksiz úlesi bar ekenligin ayrıqsha maqtanısh penen atap ótiw orınlı.
