26-may kúni Qaraqalpaq mámleketlik quwırshaq teatrında teatrǵa kelgen tamashagóyler názerine Nasiba Genjebekova saxnalastırıwındaǵı “Saray ishindegi sıyqır” teatrlastırılǵan tamasha baǵdarlaması qoyıp berildi. Tamasha baǵdarlamasında kóz qamasatınday shıraylı bezelgen saray tórinde patsha altın taxtta otırıp, wázirlerin aldına shaqıradı hám olarǵa onıń kewlin kóteriwge ámir etedi. Wázirler “ájep boladı” dep shıǵıp ketedi hám saray ortasında payda bolǵan sıyqırshı patshanıń bárshe niyetlerin ámelge asıradı. Qaraqalpaqsha, surxansha, xorezmshe qosıqlarǵa oyınǵa túsken oyınshı qızlardıń oyın-zawıqqa tolı joqarı keypiyat inam etiwshi oyınlarınan keyin patshanıń kewli kóterilip, bárshege alǵıs aytıp, minnetdarshılıq bildiredi.
