Qaraqalpaq mámleketlik quwırshaq teatrı tamashagóyler kewline qonımlı hám kishkene teatr ıqlasbentlerin jaqsılıqqa jetekleytuǵın tárbiyalıq mazmunǵa iye, sonıń menen birge tarıyxımızdı quwırshaq obrazları arqalı saxnada sáwlelendirip beretuǵın spektakl hám teatrlastırılǵan tamasha baǵdarlamaların saxnalastırıp, tamashagóylerdiń mádeniy dem alıwları ushın ayanbastan xızmet etip kelmekte. Teatr jámááti búgingi kúnge shekem tek ǵana teatr saxnasında enes, bálkim alıs aymaqlarda jasawshı teatr ıqlasbentlerine de spektakller kórsetiw máqsetinde mádeniy-dóretiwshilik xızmet saparların shólkemlestirip kelmekte. Usınday dóretiwshilik xızmet saparı búgin Shımbay rayonında shólkemlestirilip, bul rayondaǵı №2,36,37-sanlı mekteplerde tálim alıp atırǵan oqıwshılardıń dıqqatına Ulmeken Qazaqbaeva avtorlıǵındaǵı hám saxnalastırıwındaǵı “Maqtanshaq qoraz” teatrlastırılǵan tamasha baǵdarlaması usınıldı hám teatr jámááti qızıqlı hám oyın-zawıqqa tolı ájayıp tamasha baǵdarlaması ushın maqtawlı alǵıslarǵa sazawar bolıwǵa eristi.
