Búgin Qaraqalpaq mámleketlik quwırshaq teatrı saxnasında 9-fevral – ullı shayır Alisher Nawayınıń tuwılǵan kúnine baǵıshlanıp, Murat Begimov insenirovkası tiykarında saxnalastırılǵan “Chin elin dunyaǵa tanıtqan gózzal haqqında sóz” spektakli teatrǵa kelgen tamashagóylerdiń názerine biypul usınıldı hám bul tarıyxıy waqıyalardı sáwlelendiriwshi saxnalıq kórinis kóp sanlı teatr ıqlasbentlerin quwanıshqa bóledi. Ullı shayır Alisher Nawayı shıǵarmalarınıń birinde súwretlengen Chin eli gózzalın bir kózi túskende ashıq bolıp qalǵan sansız er jigitlerdi sol eldiń patshası jállat qolına tapsıratuǵın bolǵan. Bir kúnleri gózzallıǵı jáhánge dańq taratqan bul sulıw haqqında dárwish usta jigitke aytıp beredi hám usta jigit gózzaldı izlep jolǵa shıǵadı. Qız hám jigit bir-birin kórip, ashıq bolıp qaladı. Patsha jigitti aldına shaqırtıp, oǵan bálent minara qurıwǵa párman beredi. Eki ashıq minaranıń tóbesine shıǵıp, bir-birine jetiw máqsetinde appaq quslarǵa aylanıp ushıp ketedi. Al usta soqqan minara bolsa elege shekem muxabbat belgisi sıpatında saqlanıp, Chin gózzalı haqqındaǵı ápsana tillerde dástanǵa aylanadı.
